Ҳәарада аҳамҭа алхраан ахәыҷы иинтересқәеи иҭахрақәеи ирызхәыцтәуп. Акыр имариахоит ахәыҷы иалкааны акы иҭахызар, уи Аҵаа Бабаду иахь иишьҭуа асаламшәҟәы ианызар, аха ус анакәымха - рхы иҭырҳәаароуп.
Sputnik аҽазнашәеит иарбан ҳамҭоу ахәыҷы иуҭаша аҵаҳәара.
Асмаҭ Ҵәыџьԥҳа, Sputnik
Ихәарҭоу, ииҭаххаша
Аҳамҭа ахәыҷы иргәырӷьара адагьы хәарҭара алазарц шәҭахызар – иалшәх абас еиԥш иҟоу аҳамҭақәа.
Авигвам - ақьала. Ари қәацәуп, аха аҩны аҩнуҵҟа игылоуп. Шәазхәыц ахәыҷы ари иҩны ихы ишаирхәаша. Иара ара ихала дыхәмарлоит, ма иҩызцәа неиԥхьалоит, ишиҭаху ирхиалоит.
Асмарт-сааҭ – ҳамҭа шьахәуп ахәыҷы изы аҭел изаахәара заацәазар, аха еснагь дахьыҟоу удырырц уҭахызар. Асааҭ ахәыҷы иеиԥш адуцәа рзгьы абри аганахь ала ихәарҭоуп.
Ахәыҷы ашәҟәы иарԥхьара шәҽазышәшәозар иԥшӡаны иҭыжьу, ԥшшәыла еилаԥсоу ала алагара аҭахуп. Иахьатәи аамҭазы уи аганахь ала уадаҩра ыҟаӡам. Ақьаад аҿы икьыԥхьу ахәыҷы дышәзадымԥхьалозар, иҟалоит аелектронтә шәҟәы аашәхәар.
Ахәыҷы асоциалтә ҳақәа ринтерес имазар иҟалоит аблогер қәыԥш изы ахархәагақәа– амацәазтә лашарбага, аштатив, амикрофон, алымҳахаҵақәа ааухәар.
Адыррақәа ирызҿлымҳау
Амикроскоп, абинокль, ахимик қәыԥш, акристаллқәа рааӡарҭа, алаԥшхырԥагаҩ ихархәагақәа. Иахьазы асеиԥш иҟоу ахкқәа акырӡа ирацәоуп.
Ас иҟоу аҳамҭақәа ахәыҷы иҿиара ацхраара адагьы акраамҭа дрыдырхалоит. Ари аҭаацәа рзгьы иҳамҭоуп.
Агәалашәарақәа
Ашықәс ҿыц аҭаацәа ахәыҷы дзыргәырӷьаша адагьы ихамшҭыша аҳамҭа ирҭар анырҭаху аамҭоуп.
Иаҳҳәап, актәи амаланыҟәа, авидеокамера, афотоаппарат, акьанџьа аҩны, ароликқәа, даныцәо аламҭалаз еицзыԥхьаша алакәқәа реизга ма аенциклопедиа.
Ахәыҷӡақәа рзы ахәмарга тата ҳамҭа ссируп – амультфильм ма алакә афырхацәа. Шықәсқәак ҵуеит Аԥсны аԥсышәала ицәажәо ахәмаргақәа цәырҵижьҭеи. Ахәыҷқәа урҭ бзиа ирбоит.