АҞӘА, ԥхынҷкәын 22 - Sputnik. Пицунда ақалақь Акультуратә ҩны аремонт 2024 шықәсазы иалгараны иҟоуп, абри атәы аанацҳауеит арадио Sputnik апрограмма "Аԥшьаша хада" аҟны ақалақь ахада ихаҭыԥуаҩ Дауҭ Аҩардан.
"Гагра араион абиуџьет аԥарақәа рыла Акультура аҩны ахыб ҳаԥсахит. Макьанагьы аусурақәа ирҿуп. Афымца цәаҳәақәа рыԥсахит, аҩнуҵҟатәи аусурақәа ирҿуп. Аԥенџьырқәа ҿарҵеит. Актәи аихагылаҿы адашьма рыԥсахуеит", - иҳәеит иара.
Аҩардан иажәақәа рыла, Акультура ҩны етап-етапла аремонт мҩаԥыргоит. Аиҭашьақәыргылара хыркәшахоит иааиуа ашықәс азы.
"Ахәыҷқәа уа асахьаҭыхра мҩаԥыргоит, абиблиотека аус ауеит. Ахыб анахыхыз аамҭазы аӡхыҵра ҟалеит. Ашахмат асраз акружок ауада аӡы ҩналеит. Аиҭашьақәыргыларатә усқәа рышьҭахь урҭ еиҭа арахь ииагахоит", - иҳәеит иара.
Аҩардан иазгәеиҭеит акультуратә обиект аҭыԥантәи ауааԥсыра шаҭаауа, аиҳарак аҿар, ара иманшәалоу аҭагылазаашьақәа шаԥҵатәу.