АҞӘА, ԥхынҷкәын 27 - Sputnik. Аԥсны Жәлар Реизара адепутатцәа изаамҭанытәим асессиаҿы Аконституциатә закәан рыдыркылеит, Аграждантә закәанеидкылеи "Жәларбжьаратәи аиқәышаҳаҭрақәа рзы" азакәани аԥсахрақәа рыларгалеит. Адокумент кьыԥхьуп атәыла ахада исаит аҿы.
Аконституциатә закәан "Аԥсны Аҳәынҭқарра аиҳабыреи Урыстәылатәи Афедерациа аиҳабыреи рыбжьара Аԥсны Аҳәынҭқарра аҵакыраҿы иҟоу аргылара Урыстәылатәи Афедерациа иахатәны аҭаразы Аиқәшаҳаҭра анагӡараз ауснагӡатәқәа рзы" ишьақәнаргылоит адокумент амҩаԥгараз ауснагӡатәқәа.
Уи инақәыршәаны аиқәышаҳаҭра бжьыххар ахԥатәи ахаҿқәа рыҭара азин ыҟам: адгьыл, амшын ақәԥшылара ахәҭа, Аиқәышаҳаҭра аусура аамҭаз иргылоу ахыбрақәа.
Атекст аҿы иазгәаҭоуп, ари аԥҟара ақәымныҟәара аиқәшаҳаҭра аҿҳәара наӡаанӡагьы ибыжьнахыр шалшо, адокумент аҿы иарбоу, аиқәшаҳаҭра инақәыршәаны иргылоу ахыбрақәа Аԥсны ишазырхынҳәхо.
Азакәан инапы аҵеиҩит атәыла ахада Аслан Бжьаниа.
Аграждантә закәанеидкыла актәи ахәҭаҿы иалагалан аԥсахрақәа. Урҭ инарықәыршәаны атәымҳәынҭқарра адгьыл ахархәара азин аҭахар ҟалоит ишьақәырӷәӷәоу жәларбжьаратәи аиқәшаҳаҭреи, Аграждантә закәанеидкылеи, агьыл азы азакәани ишырҳәо ала.
"Жәларбжьаратәи аиқәышаҳаҭрақәа рзы" азакәан харҭәаан анормақәа рыла. Урҭ анормақәа инарықәыршәаны Аԥсны Аконституциеи Аконституциатә закәани рҿы иарбоу анормақәа ракәымкәа жәларбжьаратәи аиқәышаҳаҭра аҽа нормақәак шьақәыргылозар, ахархәара рыҭахоит Аԥсны Аконституциеи Аконституциатә закәани иадырбо анормақәа. Ара иацҵан жәларбжьаратәи аиқәышаҳаҭра бжьыххоит иара Аԥсны асуверинитет аԥхасҭа анаҭозар, ма ашәарҭадара ҵнашәаауазар, мамзаргьы Аԥсны азинеиҿкаара иаҿагылозар ҳәа.