АҞӘА, ԥхынҷкәын 27 - Sputnik. Гагра аус зуаз амаининг-ферма рыԥшааит "Амшынеиқәафымцамчи" азинхьчаратә усбарҭақәеи русзуҩцәа. Абри атәы аанацҳауеит Аԥсны аҩнуҵҟатәи аусқәа рминистрра апресс-маҵзура.
Аҟәатәи амҩаду аҟны игылау аҩны аҟны аус руан 25 маининг хархәагақәа, иара итәуп Аинар Еныкь.
Ахархәагақәа афымцацәаҳәа иаҿыганы АШәМ ашьҭаҵарҭахь инагоуп.
Аԥсны аиҳабыра ареспубликахь акриптовалиута арҳаразы ахархәагақәа ралагалара азин ааннакылеит 2020 шықәсазы. Уи ашьҭахь акырынтә аҿҳәара инахахьан. Уажәы 2023 шықәса ԥхынҷкәын 31 рҟынӡа аҿҳәара шьақәыргылоуп.
2020 шықәса раахыс ауааԥсыра ирылгоуп 6 000 хархәага инареиҳаны, убри аан Аԥсны Аҳазалхратә еилакы адыррала 2016 - 2020 шықәса цәыббрамзанӡа атәыла иалагалоуп 66 000 цыра инареиҳаны, 2020 шықәса раахыс акәзар - 27 нызқь цыра инареиҳаны ареспублика иалгоуп.