АҞӘА, ажьырныҳәа 1 - Sputnik. РУСДРАМ 2023 шықәсазы 270 спектакль ихәмарит ҳәа арадио Sputnik иазеиҭеиҳәеит атеатр адиректор хада Иракли Хынҭәба.
Иара иазгәеиҭеит, есыҽны атеатр аҟны аспектакльқәа шымҩаԥысуаз. Иара убасгьы аусзуцәа рхыԥхьаӡара иацлеит - уажәшьҭа атеатр аҟны иҳамоуп ареквизитцәа, акостиумерцәа, алашара азы аоператорцәа, арежиссиор ицхырааҩ, бжьыла аиқәыршәаҩцәа.
"Акадрқәа зегьы рыӡбоит. Ари хықәкылатәи аусеицуроуп - уи атетатр аԥхьаҟатәи ақәҿиарақәоуп", - ҳәа иҳәеит иара.
2023 шықәсазы ахәаԥшцәа идырбан аспектакль ҿыцқәа ааба, Хынҭәба иажәақәа рыла дара ахәаԥшцәа ззыҳәо спектакльқәоуп.
2024 шықәса ажьырныҳәамза инаркны аҽазыҟаҵарақәа ирылагоит Уилиам Шекспир ипиеса "Виндзорские насмешницы" ала ақәыргыламҭа. Арежиссиорс даиуеит аԥсуа хәаԥшцәа уажәшьҭа ибзианы ирдыруа, РУСДРАМ аҟны "Абырг Хабыгә игәыжь ажәабжь" ықәзыргылаз Антон Корнилов.
Фазиль Искандер диижьҭеи 95-шықәса аҵразы атеатр аҟны иқәдыргылоит аспектакль "Ахьча Махаз". Олесиа Невмержицки лықәыргыламҭа ахәаԥшцәа ирыдгалахоит лаҵарамзазы. Уаанӡа, РУСДРАМ имҩаԥгаз арежиссиортә лабораториа аҳәаақәа ирҭагӡаны ари аматериал аҟынтәи иқәыргылаз ацыԥцәаха аԥхьахә ҭыԥ аанакылеит.
РУСДРАМ адиректор хада иажәақәа рыла, иахьатәи аамҭазы атеатр еицырдыруеит, азалқәа ахәаԥшцәа рыла иҭәуеит. Есымза Аԥсны анҭыҵ агастрольқәа мҩаԥнагоит, Урыстәыла атеатр аусура ахә ҳаракны иршьоит иҳәеит Хынҭәба.