АҞӘА, жәабран 8 - Sputnik. Атәыла ахада Аслан Бжьаниеи Урыстәыла АдәАР аиҳабы Сергеи Лаврови еиԥылеит Москва. Абри атәы аанацҳауеит ахада ипресс-маҵзура.
Аиԥылараҟны апсуа-аурыс еизыҟазаашьақәа рыҿиара иалацәажәеит.
Бжьаниа Лавров идиныҳәалеит иааигәахо Адипломатиатә усзуҩцәа рымш, изеиӷьеишьеит инапы злаку урыстәылатәи аҳәынҭқарра аизҳараҿы ақәҿиарақәа.
Аслан Бжьаниа Москва иҟазаара иалагӡаны дырԥылеит Урыстәыла ахада Иусбарҭа анапхгаҩы ихаҭыԥуаҩ Дмитри Козаки, Ашәарҭадаратә хеилак амаӡаныҟәгаҩ актәи ихаҭыԥуаҩ Рашид Нургалиеви, аекономикатә ҿиара аминистр Максим Решетникови, АКХ ахантәаҩы Елла Памфилови, Афедералтә шәахтә маҵзура анапхгаҩы Данил Егорови, Урыстәыла аԥыза-министр ихаҭыԥуаҩ Александр Новаки еиԥылеит.
Аиԥыларақәа рҟны асоциал-економикатә ахырхарҭаҟны ҩ-ганктәи аусеицуреи, аенергетикеи уҳәа егьырҭ азҵаарақәеи ирзааҭгылеит, аанацҳауеит Аԥсны ахада ипресс-маҵзура.