АҞӘА, хәажәкыра 18 – Sputnik. Амаининг хархәагақәа ԥшьбеи урҭ рзы амыругақәеи рымырхит аԥснытәи аҳазалхыҩцәа хәажәкыра 16, 17 рзы. Абри атәы аанацҳауеит Аԥсны аҳазалхратә маҵзура апресс-маҵзура.
Хәажәкыра 16 рзы амаинингқәа рбеит автомашьына Toyota Alphard аушьҭырҭатә ҭыԥ "Ԥсоу" ианахысуаз. Аппаратқәа рыхәҭак автомашьына асалон аҿы иҵәахын, иаанхаз – аҵәахырҭатә хәҭаҿы.
Хәажәкыра 17 рзы автомашьына Nissan Serena аҿы ирбеит аппарат азы амыругақәа: 3 хеш платак, афымцамчхархәагатә блок, 2 ԥшандагак, агәаҭаратә плата, амҩаԥгага. Аматериалқәа нашьҭуп Аҳазалхратә еилакы аусҭҵааратә ҟәшахьы.