АҞӘА, мшаԥымза 10 – Sputnik. Ҟрыми Аԥсни русеицура азҵаарақәа ирылацәажәеит Аԥсны ахада Аслан Бжьаниеи Георги Мурадови реиԥылараҟны. Абри атәы аанацҳауеит атәыла ахада ипресс-маҵзура.
Атәыла ахада инаҵшьны иазгәеиҭеит аԥхьаҟагьы Аԥсни Ҟрыми русеицура ишацырҵо. Агәыӷрагь иааирԥшит Арратә операциа ҷыда анеилгалак аусеицуразы алшарақәа ирыцлап ҳәа, иаҳҳәап Аԥснынтә Ҟрымҟа акруизтә ӷба анашьҭра аиԥш иҟақәоу.
"Иазгәаҭоу ауснагӡатәқәа, анапы зҵаҩу аиқәшаҳаҭрақәа ҳинтересқәа, ҳажәларқәа ринтересқәа ирықәшәоит", – ҳәа иҳәеит иара.
Мурадов дазааҭгылеит мшаԥы 9 рзы имҩаԥысыз аиҳабырабжьаратә комиссиа аилатәара атәы. Иҳәеит 2025-2027 шықәсқәа рзы еицымҩаԥыргаран иҟоу аусқәа руснагӡа шдырмазеиуа ашықәс нҵәаанӡа.
Иара убасгьы иара иҳәеит, акомиссиа аӡбамҭала ишаԥҵахо Аԥсни Ҟрыми еицырзеиԥшу аусутә хеилак шаԥҵахо.