АҞӘА, цәыббра 10 — Sputnik. Лыхны ақыҭан афымцатә цәаҳәақәа реиҭарҿыцра иалагеит ҳәа аанацҳауеит Аԥсны ахада ипресс-маҵзура.
Ақыҭа ахада ихаҭыԥуаҩ Асҭамыр Бганба иажәақәа рыла, Аџьамҽыӷра аҳаблан инхо 40 ҭаацәара афымцалашаразы ауадаҩрақәа рыман.
"Амшынеиқәафымцамч" аҟазауаа 21 шьаҟа дыргылеит, зымчхара 160 кВА иҟоу атрансформатор ықәдыргылеит. Анаҩстәи аусурақәа рыхәҭа — ацәаҳәақәа рнагароуп.
Аусурақәа рзы аԥара азоужьуп ареспубликатә биуџьет аҟынтәи, урҭ амчыбжь нҵәаанӡа ихыркәшахоит.