АҞӘА, цәыббра 12 – Sputnik. Аԥсны атәылауаҩ ҩынтә иҽазишәеит закәаншьаҭада хыԥхьаӡара рацәала аҭаҭынаалыҵ Урыстәылаҟа аиагара. Абри атәы аанацҳауеит Краснодартәи аҳазалхырҭа апресс-маҵзураҟны.
Ахаҵа Аԥснынтәи Урыстәылаҟа аҳәаа дахысуан ачемодани амҩатә шәыреи иманы. Агәаҭараан идбалан асигарет "CHAPMAN" 760 ҭоԥ. Атауар аџьармыкьатә хәԥса 140 000 мааҭ артәоит.
Мчыбжьқәак раԥхьа, ари ахаҵа идырбалеит 760 ҭоԥ асигарет. Атауар имхны иганахь ала ашьаус хацыркын.
Иара 300 000 мааҭ инаркны миллионк рҟынӡа ахараԥса иршәахар ҟалоит, мамзаргьы хәышықәсанӡа ихақәиҭра далхәыдатәхар алшоит.