АҞӘА, цәыббра 18 — Sputnik. Ешыратәи абжьаратә школ аҿы аиҭашьақәыргыларатә усурақәа ирылагеит ҳәа аанацҳауеит Аԥсны ахада ипресс-маҵзура.
Ашкол аиҳабы Фатима Сақаниа лажәақәа рыла, аиҭашьақәыргыларатә усурақәа цонаҵы аҵаҩцәеи арҵаҩцәеи ааигәатәи Гәымсҭатәи ашкол аҩбатәи асменахь иныҟәалоит.
Уаҟа ажәытә ашьых амхны, афымцацәаҳәақәа ԥсахны иҟаҵоуп. Аспортзал аҟны адашьма ҿыц ықәҵоуп, аҭыӡқәа шьыхуп, аҿыԥсахырҭеи аҽыкәабарҭақәеи рҟны аиҭашьақәыргылара иаҿуп.
Иара убас иазгәаҭоуп амцацәыхьчаратә мардуан аԥсахреи, ашкол ааигәа-сигәа арҽеирақәа рымҩаԥгареи.
Анардадкылартә еиҿкаара анаԥхгаҩы Асҭамыр Қәҭарба иажәақәа рыла, аусурақәа 85% инагӡоуп, аусурақәа зегь рхыркәшара азгәаҭоуп жьҭаара акы азы.
Ареспубликатә биуџьет аҟынтәи аиҭашьақәыргыларатә усурақәа ирзоужьуп 6,5 миллион мааҭ.