АҞӘА, жьҭаара 25 - Sputnik. Аҟәа, Ӡиӡариа имҩаҟны иҟоу абылтәыҭаҭәарҭа азааигәара ашьаҟауаҩ амашьына дашьит ҳәа Sputnik иазеиҭеиҳәеит Аԥсны Аҳәынҭавтоинспекциа аиҳабы актәи ихаҭыԥуаҩ Аслан Базба.
Иара иажәақәа рыла, 39 шықәса зхыҵуаз ахаҵа иахьахәҭамыз аҭыԥ аҿы амҩа еихиҵәон. Ари аҭыԥ аҿы амашьынақәа рацәоуп.
"Mercedes амашьына аныҟәцаҩ ашьаҟауаҩы дизгәамҭаӡеит", - иҳәеит Базба.
Ахҭыс ахьыҟалаз аҭыԥ аҿы азинхьчаратә усзуҩцәа аус руеит, аматериал еизганы аусеилыргаратә ҟәшахьы инашьҭхоит.