АҞӘА, ԥхынҷкәын 4 - Sputnik. 2016 шықәса инаркны 2024 шықәсанӡа Урыстәыла афедералтә биуџьет аҟынтәи 10,5 миллиард мааҭ инареиҳаны иазоуныжьҭхьеит Аԥсныҟа иаауа афымцамч ахәԥса ахшәааразы ҳәа арадио Sputnik иазеиҭеиҳәеит аенергетикеи атранспорти рминистр инапынҵақәа назыгӡо Џьансыхә Нанба.
Иара иажәақәа рыла, 2016 шықәса раахыс ареспублика афымцамч азымхараз ауадаҩрақәа ыҟоуп. Аха уаанӡа аиҳабыра есышықәсатәи ареспубликатә биуџьет апроект аҿы арҭ ахарџьқәа адырбаӡомызт.
"Усеиԥш изыҟаз есышықәса ареспублика анапхгара еиуеиԥшым аполитикатә ӡбарақәа рыдкыларала урыстәылатәи агани дареи еилацәажәаны ӡбамҭак иахьазнеиуаз ауп. Аиҳарак афымцамч ахә Аԥсны асоциал-економикатә цхырааразы аинвистициатә программаҟынтә иршәон, ма Урыстәыла аиҳабыра алшарақәа азыԥшааны ишиашоу Урыстәылатәи Афедерациа абиуџьет аҟынтәи иршәон", — ҳәа еиҭеиҳәеит Нанба.
Иара убасгьы иҳәеит ари аамҭа иалагӡаны аинвестпрограммаҟынтәи 1,3 миллиард мааҭ инареиҳаны аԥара шныхыз.
Убри аан, аҵыхәтәантәы хышықәса ирылагӡаны Аԥсны аенергосистема ашьҭыхраз иныхуп миллиардк аҟынӡа, ари аусхк ишахәҭоу еиԥш аус ауртә иаҭахуп ф-миллиардк рҟынӡа.
"Ахыԥхьаӡарақәа ҳрылацәажәозар, 2022, 2023 шықәсқәеи 2024 шықәсеи рзы миллиард мааҭк рҟынӡа аусхк аинфраструктура иазоужьын. Ҳәарада, арҭ аԥарақәа уаанӡатәи алагалақәа раасҭа еиҳауп, аха аиҭашьақәыргыларатә программазы заанаҵтәи аҳасабрақәа рыла иаҭахны иҟоуп ф-миллиард мааҭк рҟынӡа. Аиҭашьақәыргыларатә программахь иаҵанакуеит ҳфымцатә ҳа анхамҩа зегьы атехникатә ҭагылазаашьа ишақәнагоу аиԥш ашьақәыргылара", — иҳәеит Нанба.