АҞӘА, ԥхынҷкәын 5 - Sputnik. Иахьатәи амш азы абиуџьеттә усзуҩцәа рулафахәы Аԥсны ареспубликатә биуџьет аҟынтәи ирзыршәаӡом, абри атәы иҳәеит афинансқәа рминистр инапынҵақәа назыгӡо Валери Делба, Аԥсны ахада ин.н. Бадра Гәынба имҩаԥигоз аилатәараҟны.
"Зынӡа ирызшәаӡам. Раԥхьа иргыланы ирызхьаԥштәуп азинхьчаратәии амчратәии усбарҭақәа. Иахьазы дара улафахәыда иҟоуп, иара убас ҳзакәан иарбоу егьырҭ ашәарақәеи рыда иҟоуп. Ҳалшарақәа зегьы афымцамч аахәара иазаҳкыр, иаартны иҳәатәхоит — улафахәыда ишаанхо", — иҳәеит Делба.
Иара иажәақәа рыла, Ашәахтәқәеи аизгақәеи рминистрра иеизгамкәа иҟоу ашәахтәқәа рылгара иаҿуп, аҳазалхратә шәарақәа рганахьала зегьы ианаамҭоу иаларгалахьеит иҳәеит Делба.
Афымцамч есҽны мҽхакы ҭбаала инаҳхуеит, аԥара рацәаны иагоит, атәыла аиҳабыра алшара рымаӡам урыстәылатәи афинанстә цхыраара аҭыԥан ахатә ԥарақәа абиуџьеттә усзуҩцәа руалафахәы ахь азоужьра иҳәеит афинансқәа рминистр и.н.