АҞӘА, ԥхынҷкәын 9 – Sputnik. Аҟәа ақалақь, Аршба имҩаду аҿы идырбгаз аҭоурыхтә хыбра азинтә статус азҵаара инҭырҳәцааны иҭҵаахоит иҳәеит аԥыза-министр инапынҵақәа назыгӡо Валери Бганба, ари азҵааразы имҩаԥгаз аилатәараҿы.
Аминистрцәа Реилазаараҿы имҩаԥысыз аилатәара рхы аладырхәит Аҵара аминистрреи, аспорт азы Аҳәынҭқарратә Еилаки, аҭоурых-культуратә ҭынхақәа рыхьчаразы Аҳәынҭқарратә усбарҭеи рнапхгаҩцәа рнапынҵақәа назыгӡо.
Идырбгаз ахыбраҿы уаанӡа аиқәԥареи атлетика хьанҭеи рзы ашкол ыҟан.
Аспорттә еилазаара ахаҭарнакцәа Бганба иахь аҳәара ҟарҵеит, ахыбра Аҵара аминистрра азырхынҳәраҿы ацхыраара ҟаиҵарц, иара убасгьы аремонт ахьыҟам иахҟьаны аус зымуа егьырҭ аспорттә хыбрақәа ашәҟәы иҭагалазарц.
Бганба иажәақәа рыла, уаанӡатәи аспорттә хыбрақәа ргәаҭаразы акомиссиа аԥҵахоит иахьа.
1914 шықәсазы иргылаз аферментациатә зауад ахыбра ақәгара иалагеит асабша, ԥхынҷкәын 7 рзы. Ахыбра ақәгара ашәахьанӡа иаанкылан аҭагылазаашьа ҭырҵаанӡа, аха, амҽыша ԥхынҷкәын 9 рзы ахыбра ақәгаразы аусурақәа ирыцҵан.