АҞӘА, ажьырныҳәа 11 - Sputnik. Аԥсны Аҳәынҭқарра ацҳаражәҳәаҩ Заур Ӷәаџьаа Венесуела ахада Николас Мадуро иҭоубашьҭаҵара далахәын, абри атәы аанацҳауеит Аԥсны АдәАР.
Каракас иҟоу Афедералтә закәанԥҵаратә хан аҟны имҩаԥысуаз аҭоубашьҭаҵара иалахәын 125 тәыла рхаҭарнакцәа, иара убас атәылаҟны аккредитациа змоу адипломатцәа.
Николас Мадуро атәыла дахагылеит 2013 шықәсазы. 2024 шықәса рашәарамзазы имҩаԥысуаз алхрақәа рылҵшәақәа рыла, иара хәышықәса ҳәа атәыла хадас деиҭалхын. Венесуела Аԥсны Ахьыԥшымра азханаҵеит цәыббра 10 2009 шықәса рзы.