АҞӘА, ажьырныҳәа 22 — Sputnik. Аԥсны аԥсыӡкра аамҭахәҭа алагамҭа инаркны квотала ишарбаз – 25 нызқь тонна акәымкәа 1218 тонна акамшьиа ркит ҳәа арадио Sputnik аефир аҿы еиҭеиҳәеит Аекологиаз аҳәынҭқарратә еилакы аиҳабы Савели Ҷыҭанаа.
"Аҳауа аԥхарра иахҟьаны, аԥсыӡкра ԥсыҽны имҩаԥысуеит. Аԥсыӡкраамҭа маншәалахарц азы, аԥсыӡқәа рацәаны еизароуп. Усеиԥш ҟалоит аӡы аԥхарра 8 градуск еиҳамкәа ианыҟоу. Аха сынтәа аҳауа аԥхарра иахҟьаны, амшынӡы аԥхарра 10-14 градус рҟынӡа ихалеит", — ҳәа иҳәеит иара.
Убри инамаданы, ареспубликаҿы аԥсыӡ аус адырулоит х-зауадк, хә-ӷбак Аԥсны аӡымҽхакыраҿы акамшьиа ркуеит.
Ҷыҭанаа иажәақәа рыла, аӡы аԥхарра 8 градуск аасҭа еиҵахаргьы, мызкы заҵәык ала аквотатә план анагӡара уадаҩхоит.