АҞӘА, ажьырныҳәа 28 - Sputnik. Аԥсни Урыстәылатәи аенергоеилахәыра "ИнтерРаои" афымцамч аашьҭра аҽҳәара ацҵаразы аиҿцәажәарақәа мҩаԥыргоит ҳәа иҳәеит аенергетикатә шәарҭадараз аштаб аилатәараҿы Аенергетикеи атранспорти рминистр инапынҵақәа назыгӡо Џьансыхә Нанба.
Ԥхынҷкәын 23 аахыс ареспублика урыстәылантәи агуманитартә фымцамч аиура иаҿуп, иааизакны уи 327 миллион кВт⋅сааҭ аҟынӡа инаӡоит. Уи 240 миллион мааҭ рҟынӡа ахшәаан 2024 шықәса пхынҷкәынмзазы.
Иара иажәақәа рыла, асоциалтәфымцамч иаанхаз ахәҭа жәабранмза зегьы азы атәыла фымцамчла аиқәыршәаразы иазхом.
Иазгәеиҭеит уахыки-ҽнаки рыла атәылаҟны 7,5 миллион кВт⋅сааҭ ахархәара шамоу, уи аҟнытә 6 — Урыстәылантәи иаауа афымцамч шакәу.
Иахьазы Џьуартәи аӡеизакырҭа иҭало аӡы миллион кубаметрак аҟынӡа ауп иҟоу, убри аан 7 миллион кубаметрак ахархәара амоуп.
"Амшынеиқәафымцамч" анапхгаҩы Ҭемыр Џьынџьалиажәақәа рыла атәылаҿы афымцамч ахархәара аҩаӡара шҳараку иаанхоит. Уажәтәи алашара арцәара аамҭеихша инақәыршәаны, атәыла лашарала аиқәыршәара алыршахоит жәабран 15-17 рҟынӡа.
Ажьырныҳәамза 1 инаркны Аԥсны 207,1 миллион кВт⋅сааҭ инареиҳаны иннаххьеит. 163 миллион кВт⋅сааҭ – агуманитартә фымцамч, 30 миллион кВт⋅сааҭ — ЕгрыГЕС аҟынтә, 5 миллион кВт⋅сааҭ — АҟәаГЕС аҟынтә.
Аԥсны есҽны амаинингқәа рзы 25 -27 мегаватт рҟынӡа афымцамч рхы иадырхәоит иҳәеит иара.
Аԥсны араионқәеи ақалақьқәеи рҿы "Амшынеиқәафымцамч" афымцамч ҳақәа изакәанымкәа рыҽрымадара аҿагыларазы аҭыԥантәи аоперативтә штабқәа аԥҵахоит.
Уи адагьы, Аԥсны амаининг хархәагақәа рықәхра алзыршо азакәанԥҵара аус адулара иаҿуп ҳәа адырра ҟаиҵеит аоперативтә штаб аилатәараҿы Аенергетикеи атранспорти рминистр инапынҵақәа назыгӡо Џьансыхә Нанба.