АҞӘА, жәабран 12 - Sputnik. Аԥсны алхратә ҭыԥқәа рҟны 735-ҩык амилициа аусзуҩцәа алахәхоит, резерв ҳасабла 223-ҩык рхианы иҟалоит. Еиҿкаахоит аоперативтә штаб, араионқәа рҟынтәи аинформациа ахьнеиуа, анаҩсан иахәҭоу алкаа ҟаҵаны анаҩстәи аусмҩаԥгатәқәа дҵас ианҳарҭалакгьы имҩаԥаҳгаларц. Абри азы арадио Sputnik аефир аҿы адырра ҟаиҵеит Аҩнуҵҟатәи аусқәа рминистрра ахаҭарнак Алмас Бебиа.
"Раионцыԥхьаӡа иҷыдоу оперативтә гәыԥ СОБР ҳәа изышьҭоу ахаҭарнакцәа раионцыԥхьаӡа аекипажқәа аус рулоит. Уи ада ԥсыхәа ыҟамкәан ҟамлар, аҭыԥан иҟоу амилициа аусзуҩцәа адырра анрырҭалак, аопреативтә штаб аҟынтәи адҵа ҳарҭар, убасҟан ауп ианалаҳархәхо", — ҳәа инаҵишьит Бебиа.
Аԥсны алхратә ҭыԥ хадақәа 35 рҟны алхратә ҭыԥқәа 152 ыҟоуп.
Аԥсны ахада иалхрақәа мҩаԥысраны иҟоуп иааиуа асабша, жәабран 15 рзы. Ахадарахьы иқәгылоуп хәҩык акандидатцәа: Бадра Гәынба, Адгәыр Арӡынба, Олег Барцыц, Роберт Аршба, Адгәыр Хәырхәмал.