АҞӘА, жәабран 12 - Sputnik. Аҳәынҭқарратә биуџьет ахарџь ала Гәдоуҭа аӡиас Кистрик автомобилтә цҳа хырҵоит ҳәа Sputnik иазеиҭеиҳәеит аилахәыра "Аԥсныҟәарахьчара" анџьныр хада Иури Воробиов.
Иара иазгәеиҭеит уаанӡа ари аҭыԥ аҿы ашьаҟауаа рзы шакәыз ацҳа шхыз, убри аҟнытә аҭыԥантәи ауааԥсыреи аҭыԥантәи Аизара адепутатцәеи амҩа аҭарцәра арманшәаларазы автомобилтә цҳа ахҵаразы аҳәара ҟарҵеит.
"Ақалақь агәҭанытә Аҳабла ҿыц ахь ицо мҩа заҵәык ауп – Тарнаа амҩа. Уаҟа уажәы амашьынақәа ахьырацәахаз иахҟьаны аныҟәара иуадаҩхеит, убри аҟнытә ари аҭыԥ аҿы аныҟәара армариаразы ацҳа цхыраагӡатәхоит", — ҳәа иҳәеит Воробиов.
Ацҳа аа-метрак аҭбаареи жәа-метрак ауреи аиуеит, иазоужьуп 10 миллион мааҭ инареиҳаны аԥара. Аусурақәа мызкы иалагӡаны ихыркәшахоит, амшқәа бзиахар.