АҞӘА, жәабран 15 - Sputnik. Атәыла ахадарахьы акандидат Бадра Гәынба ибжьы иҭиит Аҟәатәи аҳәынҭқарратә коллеџь аҿы иҟоу алхырҭатә ҭыԥ аҿы.
"Иахьа иааҳарԥшуеит ахдырра ду, уаҵәтәи ҳҳәынҭқарра аԥеиԥш, ҳажәлар рымҩа ақәлашьа. Хымԥада, сгәы иаанагоит, иахьа иааҳарԥшуа ҳара ҳабжьы иаҵанакуеит ирацәаӡаны, уаҵәтәи ҳԥеиԥш ҳазегьы ҳазхәыцуеит, иахьа уажәраанӡа ҳҳәынҭқарра еиқәырханы иаҳзааргаз шьҭа ҳара пату ақәҵаны аныҟәгара ҳақәшәароуп", — иҳәеит Гәынба.
Акандидат иазгәеиҭеит ибжьы шиҭиуа Аԥсны ҭышәынтәаланы иҿиаларц, Урыстәылатәи Афедерациеи ҳареи ҳаизыҟазаашьақәа ӷәӷәахарц, ҳтәылауаа рыԥсҭазаара еиӷьны, шәарҭарак ыҟамкәа, ҳаибашьцәа ззықәԥоз зегьы аиқәырхаразы.
Иахьа Аԥсны аҳәынҭқарра ахада заанаҵтәи иалхрақәа мҩаԥысуеит. Атәылаҿы иаартуп 152 алхырҭатә ҭыԥ, даҽа ҩба — Урыстәыла. Алхрақәа ирылагеит ашьыжь асабша, жәабран 15 асааҭ 08:00 рзы, алхырҭатә ҭыԥқәа рышәқәа адыркуеит ахәылбаҽха асааҭ 20:00 рзы.
Аҳәынҭқарра ахадарахьы иқәгылоуп хәҩык акандидатцәа – Бадра Гәынба, Адгәыр Арӡынба, Роберт Аршба, Олег Барцыц, Адгәыр Хәырхәмал. Аиааира игеит ҳәа дрыԥхьаӡоит алхыҩцәа рзеиԥш хыԥхьаӡара аҟнытә 50 проценти даҽа бжьыки зауз акандидат.