АҞӘА, жәабран 18 - Sputnik. Аԥсны иҟоу ауаҩытәыҩса изинқәа рыхьчаҩ Анас Қьышьмариаԥҳа Урыстәылатәи Афедерациа Ашьаусеилыргаратә еилакы ахантәаҩы Бастрыкин ареспубликаҿы Урыстәыла атәылауаа ашәарҭара рҭаргылареи рзинқәа реилагареи рганахьала аҭҵаара амҩаԥгаразы иҟаиҵаз адҵа инамаданы аҳәамҭа ҟалҵеит.
Анас Кьышьмариаԥҳа Аҳәынҭқарратә шәарҭадаратә маҵзуреи, Аԥсны Аҩнуҵҟатәи аусқәа рминистрреи, Аԥсны Апрокуратура хадеи рнапхгарақәа рахь уи иадҳәалоу азыҳәақәа лышьҭит.
"Аԥсны иҟоу ауаҩытәыҩса изинқәа рыхьчаҩ иусбарҭа ауаажәларратә еиҿкаара "Аԥсны Аерманцәа Реилазаара" ахантәаҩы А.А. Миносиан аерман милаҭ еиуоу атәылауаа рышьҭазааразы асоциалтә ҳа Аинтернет аҿы иаларҵәаз ааԥхьара зну аудионҵамҭақәа рзы азинхьчаратә усбарҭақәа рахь иҳәамҭа ишашьклаԥшуа", — ҳәа азгәаҭоуп аҳәамҭаҿы.
Анас Қьышьмариаԥҳа илҳәоит адинхаҵаратә, амилаҭтә, мамзаргьы даҽа мзызк азы ауаҩы изинқәа реилагара шыҟамло. Аԥсны Аконституциеи азакәанқәеи реилагара адагьы, амилаҭ аилыхрала ақәыӷәӷәарақәа ареспубликаҿы инхо ажәларқәа ркультуреи, рҵасқәеи, рдунеихәаԥшышьақәеи ҭаацәарак реиԥш реицынхашьа шьаҭанкыла ирҿагылоит ҳәа.
Иацы Апрокуратура хада Аԥсны Аерманцәа реилазаара ахантәаҩы А.А. Миносиан Аинтернет аҿы ирыладырҵәаз аудионҵамҭақәа рышьаҭала, атәылауаа Бганба Е.З., Ванаба Иу. Аԥсны аҳәынҭқарра иатәылауаау аерманцәа рполитикатә гәаанагаразы ирышьҭаларц ааԥхьара ҟарҵоит.