АҞӘА, жәабран 28 - Sputnik. Аԥсны Аиашахаҵаратә уахәама аиҳабы Аб Виссарион (Аԥлиа) Аԥсны ажәлар рахь ааԥхьара ҟаиҵеит акзаареи аҭынчреи аадырԥшырц.
"Ҳаԥсуа жәлари аԥсуа дгьылаҿы инхо ауааи ракзаара еиҳарак изыӡбо дара ауаа рморалтә ҭагылазаашьа ауп: ицәаҩашәоу ауаҩы ихықәкқәа рынагӡаразы аиҿагылара ӷәӷәа аметодқәа ихы иаирхәом, аимак-аиҿакқәа ирцыхцыхуам. Ацәаҩашәара еизааигәоу ауаҩи ауаҩи реиӷарара ааннакылоит. Ҳаԥсадгьыл иахьа абжьааԥны еиԥшымкәа аҭынчреи акзаареи аҭахуп ", — азгәаҭоуп Аб Виссарион иааԥхьараҿы.
Иара аԥсуа уаажәларра ргәырҽаниҵеит аимак-аиҿакқәеи аҽеиҟәшареи рҽырцәырыхьчарц.