АҞӘА, ԥхынгәы 11 - Sputnik. Аԥсны Аминистрцәа реилазаара апоет Иуа Коӷониа ибаҟа апроект аҟаҵаразы иаарту аицлабра рыланаҳәоит, абри атәы аанацҳауеит аиҳабыра рпресс-маҵзура.
Абаҟа Аҟәа ихьӡ зху ашҭаҿы ашьақәыргылара азгәаҭоуп.
Аскульпторцәеи, архитекторцәеи, аҟазаратә гәыԥқәеи рхы аладырхәырц иаарԥхьоит. Апроектқәа аԥсуа поет ихаҿсахьа аныԥшуазароуп, аҭоурыхтә-культура хшыҩзышьҭра аҭаны ашҭа архитектура иақәшәозароуп.
Иуа Коӷониа раԥхьатәи ибаҟа ргылан 1964 шықәсазы. Уи ааха аҭан Аԥсны Аџьынџьтәылатә еибашьраан. Аҿыц апоет игәалашәара анаунагӡатәразы акыр зҵазкуа шьаҿаны иҟалоит.