АҞӘА, ԥхынгәы 18 — Sputnik. Гәдоуҭа амаининг азы ахархәагақәа хәба рыԥшааит ҳәа аанацҳауеит Аԥсны аҳазалхратә еилакы.
Аҳазалхратә ҭыԥ "Ԥсоу" аусзуҩцәеи Аԥсны АШәМ рыцхыраарала ԥхынгәы 17 рзы Гәдоуҭа ақалақь аҿы иԥшаан Аԥсныҟа закәаншьаҭада иаагаз акриптовалиута арҳаразы амаининг хархәагақәа хәба.
Очамчыратәи амҩа 37 аҿы ирыԥшааит х-аппаратк, егьырҭ ҩ-аппаратк рыԥшааит агәыларатәи 35-тәи аҩнаҿы. Аппаратқәа афымцаҳақәа ирҿыԥшьымызт.
Амаининг хархәагақәа рымхуп. Административтә еилагарақәа рзы аусқәа аартуп.