АҞӘА, нанҳәа 17 - Sputnik. Амедиалига аҳәаақәа ирҭагӡаны ашьапылампылтә клуб "Аԥсни" москватәи акоманда "Чертанови" реицыхәмарра аламҭалазы Аԥснытәи ашьапылампыласцәа раԥхьатәи аҽазыҟаҵара мҩаԥыргеит аҟәатәи астадион "Динамо" аҟны, абри атәы Sputnik иазеиҭеиҳәеит Ашьапылампыл афедерациа ахада Шабаҭ Логәуа.
"Раԥхьатәи ахәмарра мҩаԥгахоит нанҳәамза 30 рзы, аҽазыҟаҵарақәа ҳрылагахьеит. Акоманда зегьы нагӡаны ихарҭәааӡам, уаҵәы ахәмарҩцәа аараны иҟоуп. Аспортсменцәа ргәалаҟазаара бзиоуп", — иҳәеит иара.
Логәуа иажәақәа рыла, "Чертаново" — аԥышәа змоу ахәмарҩцәа рыла ишьақәгылоуп. Уажәаԥхь аԥсуа спортсменцәеи дареи еицымхәмарӡацт, аха акоманда еицырдыруеит, ҵыԥх ари аклуб азы дыхәмаруан Аԥснытәи ашьапылампыласҩы Руслан Шьониа.
Ашьапылампыл афедерациа ахада иазгәеиҭеит, имҩаԥысраны иҟоу ахәмарраҿы "Аԥсны" алшара бзиақәа шамоу, избанзар аԥсуа спортсменцәа рыхәмаршьеи рхымҩаԥгашьеи "маӡоуп".