АҞӘА, нанҳәа 22 - Sputnik. Аԥсны атуризм аминистрра атуристтә еилахәыра "Турист" аусушьа гәанаҭеит.
Амаҵзуратә ҭҵаара шьаҭас иаман анаплакы автотранспорттә база амашьынаныҟәцаҩцәа рганахь ала аекскурсиатә программақәа системала рԥырхагахареи аусуратә леишәа аилагареи ҳәа аанацҳауеит аусбарҭа.
Атуризм аминистр ихаҭыԥуаҩ Дмитри Занҭариа инапхгарала акомиссиа еиҿкаан. Агәаҭара иаҵанакуеит еиуеиԥшым ахырхарҭақәа:
Амашьынаныҟәцаҩцәа аусуреи аԥсшьареи ррежим ақәныҟәара;
Аныҟәаратәи атранспорттәи ашәҟәбӷьыцқәа ииашаны реиҿкаара;
Аихшанҵақәеи амаршрутқәеи рықәныҟәара;
Атранспорт атехникатә ҭагылазаашьа;
Абылтәы ахархәара;
Аусзуҩцәа атуристцәа рганахь ала русура ахаҭабзиара.
Агәаҭара мҩаԥысуанаҵы, анаплакы анапхгаҩы Р. Л. Кәакәасқьыр инапынҵақәа рынагӡара аанкылоуп. Аамҭала аилахәыра анапхгаҩы инапынҵақәа рынагӡара лыдҵоуп аҳасабеилыргаҩ хада Галина Ҳашыгԥҳа.
Алкаақәеи абжьгарақәеи ахьарбоу ахыркәшаратә шәҟәы нанҳәамза 27 рзы атуризм аминистр иахь инагахоит.