АҞӘА, жьҭаара 1 - Sputnik. Азакәан "Еиҭамҵуа амазара акадастр" амч аиуит Аԥсны.
Уажәшьҭа, азакәантә ҵакы змоу анхарҭатә усқәа рымҩаԥгаразы, акадастртә шәҟәҭагалареи амазара азинқәа реиҭашәҟәҭагалареи рыҭара хымԥадатәиуп.
Азакәан хықәкы хадас иамоуп атәылауаа уаанӡа ашәҟәы иҭагалаз рзинқәа реиҭаҭаҩра.
Иара убас, Акадастртә палата аҳәынҭқарратә информациатә портал аартра азԥхьагәаҭоуп, уа акадастр иазку адыррақәа зегьы рыԥшаара алыршахоит, иара убас, ахсаалақәеи, асахемақәеи, аҵәаӷәанҵақәа, адыррақәа рфонд рбаразы агеопортал аԥҵахоит.
2024 шықәса абҵарамза 24 рзы Аԥсны Жәлар Реизара-Апарламент аҿы "Еиҭамҵуа амал акадастр азы" азакәан рыдыркылеит. Уи ҳазҭоу ашықәс рашәарамзазы амч аиур акәын. Уаанӡа атәылаҿы еиҭамҵуа амазараз азинқәа рҭаҩреи урҭ рзы адыррақәа рыҵәахреи рзы иаку асистема ыҟамызт.