Станислав Лакәаба
Цәыббра 20 рзы машәырла дҭахеит иналукааша аԥсуа ҭоурыхҭҵааҩ, апрофессор, академик Станислав Лакәаба. Иара 72 шықәса ихыҵуан.
Аҵарауаҩ иԥшәмаԥҳәыси иареи амҩатә машәыр иақәшәеит. Ааха зауз Гәдоуҭатәи араионтә хәшәтәырҭахь инаргеит, аха Лакәаба иеиқәырхара залмыршахеит.
Станислав Лакәаба – аҭоурыхҭҵааҩ-кавказдырыҩ, Д.И. Гәлиа ихьӡ зху Аԥсуаҭҵааратә институт аҭоурых ҿыци иҿыцӡоу аҭоурыхи рыҟәша аҭҵаарадырратә усзуҩ хада, ААУ апрофессор, Адыгатәи жәларбжьаратәи аҭҵаарадыррақәа ракадемиа академик, Дырмит Гәлиа ихьӡ зху Аҳәынҭқарратә премиа алауреат, "Ахьӡ-Аԥша" аорден II аҩаӡара занашьоу, 1989 шықәсазтәи Лыхнытәи ааԥхьара автор, арҵагатә цхыраагӡа "Аԥсны аҭоурых" авторцәа руаӡәк.
Алықьса Гогәуа
Аԥсуа литература аклассик, акульттә роман-рапсодиа "Асду" автор Алықьса Гогәуа иԥсҭазаара далҵит лаҵарамза 7 рзы. Гогәуа Аԥсны амилаҭ-хақәиҭратә қәԥара ахыҵхырҭаҿы дгылан. Иара жәлар ракзаара Афорум "Аидгылара" раԥхьатәи напхгаҩуп. Еиуеиԥшым ашықәсқәа рзы ажурнал "Алашара" аҭакзыԥхықәу маӡаныҟәгаҩыс дыҟан, ахәыҷтәы журнал "Амцабз" аредактор хадас дыҟан, напхгара аиҭон Аԥсны Ашәҟәыҩҩцәа Рридгыла.
Алықьса Гогәуа – Аԥсны Жәлар рышәҟәыҩҩы, Дырмит Гәлиа ихьӡ зху Аҳәынҭқарратә премиа алауреат, "Ахьӡ-Аԥша" аорден I аҩаӡара занашьоу, 10 инареиҳаны апроза шәҟәқәеи, апиесақәа ҩбеи, акритикатәи апублицистикатәи статиақәеи аочеркқәеи дравторуп. Ироман-рапсодиа "Асду " Аԥсны икульту рҿиамҭахеит.
Никита Симониан
Абҵара 23 рзы иԥсҭазаара далҵит илегендартәу ашьапылампыласҩы Никита Симониан. Жьҭаара 12 рзы иара 99 шықәса ихыҵра азгәеиҭеит.
Никита Симониан диит 1926 шықәсазы Армавир, 30-тәи ашықәсқәа рзы иҭаацәа Аҟәаҟа ииасит, Аҟәатәи "Динамо" аҿы ишьапылампылтә кариера хацыркхеит. Иара 160 хәмарра дрылахәын, "Спартак" ахьӡала 160 мпыл ҭаиршәит, СССР еизгоу акоманда азы 20 хәмарра мҩаԥигеит, ашьапылампыл азы аолимпиатә чемпионс дҟалеит. Симониан Аԥсни Урыстәылеи аҳәынҭқарратә ҳамҭақәа рацәаны ианашьоуп. "Ахьӡ-Аԥша" аорден II аҩаӡара ианашьан, жьҭаара 10 рзы "Урыстәыла аџьа Афырхаҵа" ҳәа ахьӡ ихҵан.
Таисиа Аланиаԥҳа
Ажьырныҳәа 10 рзы лыԥсҭазаара далҵит аҵарауаҩ-амузеиҭҵааҩ, Аԥснытәи аҳәынҭмузеи аԥсабара аҟәша аиҳабы, акультура зҽаԥсазтәыз Аусзуҩ Таисиа Аланиаԥҳа.
Аланиаԥҳа Аҟәатәи аҳәынҭқарратә арҵаҩратә институт абиологиа-географиатә факультет далгеит, 1972 шықәса раахыс Аԥснытәи аҳәынҭқарратә музеи аҿы аус луан, адәынтәи аҭҵаарақәа дрылахәын, ахәшә злыҵуа аҵиаақәеи урҭ жәлар рмедицинаҿы рхархәареи ҭылҵаауан.
Иара убас, лара Аҟәатәи Ақәыԥшцәа рыҩны аҿы аус луан, ахәыҷтәы екологиатә лагер напхгара алҭон.
Таисиа Аланиаԥҳа 200 инареиҳаны аҭҵаарадырратә статиақәа дравторуп. Иара убас, 2023 шықәсазы лара аҭыжьра иазлырхиеит лыԥшәма Анзор Агәмаа ишәҟәы "Аҟәа. XIX ашәышықәса анҵәамҭеи XX ашәышықәса алагамҭеи рзы ақалақь аҭоурыхи архитектуреи ирызку аочеркқәа".
Олег Боциев
Нанҳәа 28 рзы иԥсҭазаара далҵит Аԥсны иҟоу Аахыҵ Уаԥстәыла ацҳаражәҳәаҩ Олег Боциев. Боциев диит 1954 шықәсазы Тҟәарчал, 1976 шықәсазы дДалгеит Харьковтәи аҳәынҭқарратә университет амеханикатә факультет. 1992 шықәсазы Аԥсны атранспорти аимадареи рзы аминистр ихаҭыԥуаҩыс дҟалеит, иара убас Атәылахьчара аминистрреи, Аминистрцәа Реилазаареи, аџьеи асоциалтә хьчареи Рминистрреи рҿы еиуеиԥшым амаҵурақәа рҿы аус иуан. 2007 шықәса раахыс Боциев Аԥсны иҟоу Аахыҵ Уаԥстәыла ацҳаражәҳәарҭа абжьгаҩ-цҳаражәҳәаҩыс дыҟан. Мшаԥымза 15, 2013 шықәса рзы Аахыҵ Уаԥстәылатәи ахада Леонид Тибилов Иусԥҟала Аԥсны иҟоу аҷыдалкаатә зинмчы змоу цҳаражәҳәаҩыс дҟаҵан.
Раиса Гәыблиаԥҳа
Абҵара 6 рзы 95 шықәса дшырҭагылаз лыԥсҭазаара далҵит аҵарауаҩ-абызшәадырҩы, "Ахьӡ-Аԥша" аорден III аҩаӡара занашьоу Раиса Гәыблиаԥҳа.
Раиса Гәыблиаԥҳа хыԥхьаӡара рацәала аҭҵаарадырратә усумҭақәа, амонографиақәа, ашәҟәқәа, ацхыраагӡақәа дравторын.
Аҵарауаҩ еиҳа аҵакы змоу лусумҭақәа ирылукаар ҟалоит "Аԥсуа етимологиазы аочеркқәа", "Аԥсуа-адыга етимологиа", "Кавказтәи абызшәақәа рыбжьара аԥсуа бызшәа аҭыԥ", "Аԥсуа-абаза диалектологиа" уҳәа егьырҭгьы.
Даур Инаԥшьба
Ажьырныҳәа 20 рзы иԥсҭазаара далҵит Аԥсны зҽаԥсазтәыз ажурналист, арратә корреспондент, "Ахьӡ-Аԥша" аорден III аҩаӡара занашьоу Даур Инаԥшьба.
Даур Инаԥшьба аԥсуа радио аҟны аусура далагеит 23 шықәса анихыҵуаз. Дук мырҵыкәа дҭалоит МГУ ажурналистика афакультет, иреиҳау аҵараиурҭа даналга ашьҭахь агазеҭ "Аԥсны ҟаԥшь"а аҿы аусура далагоит.
1990 шықәсазы аԥсуа телехәаԥшраҿы икариера хациркит. Аԥсны Аџьынџьтәылатә еибашьра ашықәсқәа раан иара Мраҭашәаратәии Мрагыларатәии афронтқәа рҿы арратә корреспондентс дыҟан, уи азы ианашьан "Агәымшәаразы" амедал. Даур Инаԥшьба иԥсҭазаара далҵит 65 шықәса дшырҭагылаз.
Александр Банников
Амҵәышәмпыл азы РСФСР-и Аԥсни зҽаԥсазтәыз азыҟаҵаҩ, аорден "Ахьӡ-Аԥша" III аҩаӡара занашьаз, апрофессор Александр Банников иԥсҭазаара далҵит нанҳәамза 29 рзы.
Александр Банников аԥсуа амҵәышәмпыл аҿиараҿы илшамҭақәа шьардоуп. Иара иеиҵеиааӡеит ахәмарыҩцәеи азыҟаҵаҩцәеи рабиԥарақәа, ашәҟәы "Аԥсны аспорттә хьӡы-ԥша" авторс дыҟан, иаԥшьгарала 2002 шықәса рзы ареспублика ахацәа ркоманда Аладатәи афедералтә округ ачемпионат алахәхара иалагеит.
Александр Мақсим-иԥа аӡбаҩс дыҟан Аԥсны аҩбатәи ахада Сергеи Багаԥшь ихьӡ зху амҵәышәмпыл азы атурнир аҟны, апедагогикатә ҭҵаарадыррақәа дыркандидатын, Аԥсны аспорт азҟаза, Урыстәыла абаҩырҵәыра зҽаԥсазтәыз аусзуҩ.
Изольда Арухааԥҳа
Аԥсуа драматә театр актриса Изольда Арухааԥҳа 64 шықәса шылхыҵуаз лыԥсҭазаара далҵит жәабранмза 3 рзы. Лара Аԥсуа драматә театр аҿы аус луан 1986 шықәса раахыс.
"Зеиԥш маҷыз абаҩхатәреи, иалылхыз аус гәык-ԥсыкала лазыҟазаареи, лгәыкреи ирылдыршеит Изольда Кәычка-иԥҳа аҟазараҿы даҽакы иаламҩашьо лымҩа аԥшаара. Лысценатә усумҭақәа аинтерес рыҵоуп, иҷыдоуп, еилукаартә иҟоуп. Актриса атеатр арепертуар аҿы лусура ду актриса нага лаҳасаб ала лҭагылазаашьа арӷәӷәеит", ҳәа азгәарҭеит Аԥсны Акультура аминистрраҿы.
2016 шықәсазы актриса Sputnik апроект "Аԥсҭазаареи атеатри" далахәын. Лара еиҭалҳәон аспектакль аламҭалаз еснагь уи ҩныҵҟала лыҽшазыҟалҵоз, лымчи лымчхареи зегьы уи ишазылкуаз.
Беслан Бебиа
Абҵарамза 20 рзы иԥсҭазаара далҵит Аԥсны зҽаԥсазтәыз артист, 1992–1993 шықәсқәа рзтәи аибашьра аветеран Беслан Бебиа.
Беслан Бебиа данқәыԥшыз аахыс иаб, Аԥсны жәлар рартист Едуард Бебиа иаԥҵамҭаз Аҳәынҭқарратә акәашаратә ансамбль "Шьараҭын" аҟны дкәашон.
1996 шықәсазы ансамбль абалетмеистерси адиректорс дҟалеит. Иара ахореографиатә композициақәа "СССР ажәларқәа реиҩызара", "Кавказ ажәларқәа реиҩызара" ықәиргылеит. "Шьараҭын" ақәыргыламҭақәа "Ауапақәа рыла акәашара", "Нарҭаа" рҿы акәашара хада наигӡон.
Гьаргь Шьониа
Иԥсҭазаара далҵит Гал араионтә хәшәтәырҭеи ақалақь АЕМ-и уаанӡа рҳақьым хадас иҟаз Гьаргь Шьониа.
Гьаргь Шьониа 2007 шықәса инаркны 2020 шықәса рҟынӡа Галтәи араионтә хәшәтәырҭеи Асанитар-епидемиологиатә маҵзуреи напхгара риҭон. Сеченов ихьӡ зху академиа далганы иреиҳау акатегориа иаҵанакуа аҳақьым-кардиолог ҳәа ахьӡ иман. Иара "Арратә медицинахь илагалазы" амедал ианашьоуп.
Елеонора Козьмиди
Ԥхынгәымза 17 рзы Аԥсны зҽаԥсазтәыз арҵаҩы, амилаҭтә-хақәиҭратә қәԥара алахәыла Елеонора Козьмиди лыԥсҭазаара далҵит.
Лара 60 шықәса афортепиано длырҵон Алықьса Чычба ихьӡ зху Аҟәатәи аҳәынҭқарратә музыкатә ҵараиурҭаҿы, аԥсуа музыкантцәа аӡәырҩы еиҵалааӡеит.
Акультуреи аҟазареи русзуҩцәа рааӡараҿы лылшамҭақәа рзы аҳәынҭқарратә ҳамҭа "Ахьӡ-аԥша" ахԥатәи аҩаӡара ланашьоуп.
Родион Харзалиа
Нанҳәамза 17 рзы иԥсҭазаара далҵит Аԥсуа драматә театр актиор Родион Харзалиа.
Родион Харзалиа диит 1978 шықәса хәажәкыра 8 рзы, Аацы ақыҭан. 1994 шықәсазы далгеит Аацытәи абжьаратә школ.
Черқьессктәи акультуреи аҟазареи рҵараиурҭа атеатралтә студиа даушьҭымҭан. 1998 шықәса раахыс Аԥсуа театр аҿы актиорс аус иуан.
Харзалиа раԥхьатәи ироль наигӡеит аспектакль "Насреддин ихьтәы ҽада" аҟны. Иара убас, Аԥсуа театр аспектакль "Гарольди Моди" аҟны ароль хада наигӡеит.
Радион Харзалиа дызлахәыз аспектакльқәа – "Аԥара ду", "Амҳаџьырқәа", "Ажьақәеи амаҭ дуқәеи".