АҞӘА, ажьырныҳәа 25 — Sputnik. Аԥсны Аҳәынҭқарратә кинофонд аԥҵара азԥхьагәаҭоуп ҳәа арадио Sputnik аефир аҿы иҳәеит Аԥсны Акультура аминистрра акинематографиа аҟәша аиҳабы Ҭеимураз Ҭаниа.
Иара иажәақәа рыла, Урыстәыла Аҳәынҭкинофонд аҿы Аԥсны иазку шәкыла афильмқәа ыҟоуп. Урҭ ацифрахь ииаганы анаҩс, ахатәы фонд аҟны аҵәахра ргәы иҭоуп.
"Ари даара акыр иаԥсоуп. Ԥыҭрак ашьҭахь акы дҳарбар ҟалоит. Сгәы иаанагоит уаҟа аинтерес зҵоу аусумҭақәа ыҟоуп ҳәа", — иҳәеит Ҭаниа.
Ааигәа Акультура аминистрраҿы иаԥҵан акинематографиа аҟәша. Ҭаниа иажәақәа рыла, макьана азакәаншьаҭазы аусура цоит.