АҞӘА, хәажәкыра 4– Sputnik, Бадраҟ Аҩӡба. Очамчыратәи аԥсыӡзауад аҵәахырҭаҟны иҟалаз абылра аанкылан ҳәа адырра ҟарҵеит Аҭагылазаашьа ҷыдақәа рзы аминистрра апресс-маҵзураҿы.
Аԥсыӡзауад аҟны амцакра иалагеит 12:30 сааҭ рзы.
"Абылра аанкылоуп, амцакра иахҟьаны аӡәгьы ааха имоуит", - ҳәа азгәарҭеит апресс-маҵзураҿы.
Амца арцәаразы аҭыԥ ахь иааган амцарцәага машьынақәа хәбеи, аиқәырхагатә машьынаки, аус руан ҩажәаҩык амцарцәаҩцәа.
Амца иалабылуан ирхианы иҟаз аалыҵ – ааҵәақәа ирҭаз аԥсыӡшыла. Амцакра мзызс иаиуз аилкаара иаҿуп.