АҞӘА, цәыббра 2 - Sputnik, Саида Жьиԥҳа. Аҵарадырра амш аҽны, Гагра араион иаҵанакуа 18 школ рахь инеит 4743-ҩык ахәыҷқәа. Урҭ рахьтә раԥхьаӡакәны ашкол ашәхымс ихыҵит 492-ҩык.
Гагра араион аҵара аҟәша аиҳабы Мадина Ажьиԥҳа лажәақәа рыла, зынӡа аҭаацәарақәа рҟынтә аԥсуа школқәа рахь иалаҵан 124 арзаҳал, аурыс школқәа рахь - 312, аерман школқәа рахь - 56.
Ҳ.Ҳ. Чамагәуа ихьӡ зху Гагратәи абжьаратә аԥсуа школ №1 аиҭашьақәыргылара макьана иахьхыркәшам азы, цәыббра 2 рзы уи аҵаҩцәа рҵарашықәс ҩаԥхьа иалагеит Гагратәи аҟазара ашкол ахыбраҟны. Ашҭа даҽа ҽнак иеиԥшымкәа аныҳәа иашьашәало иҩычан. Араҟа шьыжьнаҵы иқәыҩуан аԥсуа ашәақәа. Иниас-ааиасуаз рыла ҭраа иԥшуан. Ари аҽны изгәаламшәада зхәыҷра…
Зхы-зҿы зхаччо аԥсшәа еибызҳәоз арҵаҩцәеи аҵаҩцәеи рыбла ихубаалон шаҟа игәхьааибагаз. Раԥхьаӡакәны аҵарадыррахь зшьаҿа еихызгаз ахәыҷқәа ракәзар, ргәы хыҭхыҭуа ашәҭқәа ирыгәҭылыҳәҳә ацәаҳәа иқәгылан. Сынтәа урҭ рхыԥхьаӡара 42-ҩык ыҟоуп.
Агәырӷьаратә мшы ашҭа ҭзырҭәааз ирыдылныҳәалеит ашкол адиректор Хана Гәынԥҳа.
"Ҽаанбзиала шәнеиааит хәыҷи-дуи. Аԥеиԥш лаша иашьагәыҭу иахьатәи амш шәадныҳәалазааит. Аҵарадыррахь зшьаҿа еихызгаз мышьҭабзиала ҳәа шәасҳәоит. Агәра ганы сыҟоуп, аԥсуа школ аҭыӡқәа нзыжьуа ахәыҷқәа наҟ-наҟ Аԥсны ԥсыцқьарыла амаҵ азыруартә еиԥш ишазгыло, уи азы ҳара иҳалшо зегь ҟаҳҵоит", - ҳәа азгәалҭеит лара.
Аныҳәатә цәаҳәаҟны рыхьӡ ҳәан, арҽхәабӷьыцқәа рыла иалкаан иҳаҩсыз аҵара шықәс иалагӡаны ашколтә ԥсҭазаара активла иалахәыз ахәыҷқәа.
Аныҳәа иацнаҵеит аԥсуа школ аҵаҩцәеи арҵаҩцәеи рымчала еиҿкааз аконцерттә программа.
Иара убас шәаԥхьар ҟалоит:
Ҷкотуа: Гагратәи аԥсуа школ ҭагалан ахархәарахь инашьҭхоит