АҞӘА, абҵара 22 – Sputnik, Сариа Кәарцхьиаԥҳа. Аԥсны зҽаԥсазтәыз артист, ауарӷанарҳәаҩ Лука Гаделиа Москва аконцертқәа ԥшьба мҩаԥигараны дыҟоуп ҳәа арадио Sputnik иазааицҳаит Лука Гаделиа.
Абҵара 22 рзы аԥшьацқьақәа Пиотри Павели ркафедралтә уахәамаҿ имҩаԥысуа апроект "Ақалақь ду аҿы ауарӷан" далахәхоит. Аԥсуа уарӷанарҳәаҩ инеигӡараны дыҟоуп акомпозиторцәа Франк, Бельман, Ион, Луи Вьерна рырҿиамҭақәа.
"Аконцерт иалахәхоит егьырҭ ауарӷанарҳәаҩцәагьы. Инагӡахоит америкатәии италиатәии акомпозиторцәа рмузыка. Сара парижтәи акомпозиторцәа рмузыка насыгӡоит. Аконцерт шьақәгылоуп– франциатәи, америкатәи, италиатәи амузыка ала", – иҳәеит иара.
Абҵара 23 асааҭ 17:00 рзы Лука Гаделиеи асопрано Кристина Ешԥҳаи, арфарҳәаҩ Оксана Сушковеи аконцерт мҩаԥыргоит Царицыно амузеи-ҳәырԥсарраҿы.
"Ауарӷан, арфа, ашәа – реилаӡҩара аинтерес аҵалоит. Арепертуар ҿыц азҳархиеит", - иҳәоит Гаделиа.
Иара убри амш аҽны, асааҭ 21:00 рзы Лука далахәхоит афонд Belcanto аконцерт. Уа иара инеигӡоит Бах ирҿиамҭақәа реиԥш ҳаамҭазтәи акомпозитор-аминималист Филип Гласс ирҿиамҭақәагьы.
Абҵара 24 рзы, Урыстәылазегьтәи ауарӷан Амш аан Лука Гаделиа Гоголев ихьӡ зху абиблиотекаҿы аконцерти алекциеи мҩаԥигоит.
"Инасыгӡо арҿиамҭақәа срылацәажәоит. Апрограмма акыр еиуеиԥшым. ХХ ашәышықәса аборокко инаркны ҳаамҭазтәи амузыкаҟынӡа аҽеиҵнахуеит", - иҳәоит Гаделиа.
Лука Гаделиа – аҟыбаҩ ду злоу амузыкант, ауарӷанарҳәаҩ, еиуеиԥшым жәларбжьаратәи афестивальқәа рлахәыла. 2006 шықәса раахыс Пицундатәи ауахәама асолист.
Иара убас шәаԥхьар ҟалоит:
- Лука Гаделиа Большои театр аҟны раԥхьаӡа акәны дықәгылеит
Лука Гаделиа: апублика шеиуеиԥшым еиԥш ирыдугалогь еиуеиԥшымзароуп