АҞӘА, ажьырныҳәа 22 - Sputnik. Коронавирус иахҟьаны иахьазы Китаи жәҩык ауаа рыԥсҭазаара иалҵхьеит, 440-ҩык ачымазара рылаҽуп ҳәа аанацҳауеит РИА Новости агигиенеи агәабзиареи рызҵаарақәа рзы КЖәР аҳәынҭеилакы аиҳабы ихаҭыԥуаҩ Ли Бинь иажәақәа ҵаҵӷәыс иганы.
"Ишьақәырӷәӷәоуп иахьатәи аамҭазы акоронавирус ахк ҿыц Китаи 440-ҩык ирылаҽны иҟоуп, жәҩык ԥсхьеит ҳәа", - иҳәеит Ли Бинь.
Уаанӡатәи адыррақәа рыла 324-ҩык ачымазара рыман, фҩык ԥсхьан.
Китаи анапхгара официалла ирҳәеит авирус ауаҩы иҟынтәи ауаҩ иахь еиҭасуеит ҳәа. Убри аан иара еиҳарак ииасуеит ҳауала. Амедикцәа авирус еиҭа аҽаԥсахыр ҟалоит ҳәагьы рҳәоит.
Астратегиатә планмҩаԥгара Ацентр аиҳабы ихаҭыԥуаҩ Герман Шипулин аҳәамҭа ҟаиҵеит Урыстәыла авакцина шаԥырҵо, аха иара аԥҵара шықәсыбжак аҟынӡа иадхалоит. Жәабранмзазы акоронавирус аарԥшразы аекспресс-тест аԥҵахоит иҳәеит агәабзиарахьчара аминистр ихаҭыԥуаҩ Олег Салагаи.
Коронавирус ахк ҿыц - 2019-nCoV Китаи аҳәаақәа ирҭыҵны Алада Кореиа, Иапониа, ЕАА, Таиланд инеихьеит. Ахабар рбахьеит Сингапур, Гонконг, Австралиа.
Иара убас шәаԥхьар ҟалоит:
Агәабзиарахьчара аминистрра алаҵа ҿыц аанахәеит
Аимҳәазы х-еилазаарак змоу алаҵа ааргеит Аԥсныҟа