АҞӘА, цәыббра 29 - Sputnik. Аҟәатәи абжьаратә школ №10 мчыбжьык иаркхоит ҳәа лҳәеит Аҟәа ахадара аҵараз Аусбарҭа аиҳабы Асҭанда Ҭаркьылԥҳа. Абри атәы аанацҳауеит ақалақь ахадара асаит.
"Арҵаҩцәеи аҵаҩцәеи рыбжьара ачымазара алаҵәара иахьалагаз инадҳәаланы, аепидемиологиатә цәаҳәа аиԥҟьаразы Н. Лакоба ихьӡ зху абжьаратә школ №10 цәыббра 29 инаркны жьҭаара 5 рҟынӡа иаркхоит", - лҳәеит Ҭаркьылԥҳа.
Асанитар-епидемиологиатә маҵзура ашколқәа рҿы COVID-19 аҟазаара ангәарҭоз иаарԥшхеит ари ашкол аҿы цәыббра 1-28 рыҩныҵҟа акоронавирустә инфекциа шрыхьыз быжьҩык арҵаҩцәа, 26-ҩык аҵаҩцәа, амедиеҳәшьа.
Цәыббра 25 раахыс еиуеиԥшым аклассқәа хԥа рҿы ԥшьҩык чмазцәахеит.
"Асанитар-епидемиологиатә маҵзура абжьгарала ақалақь ахада иҳардырит абжьаратә школ №10 мчыбжьык ишаҳаркуа. Уажәы аныҳәатә ԥсшьарамшқәа ҟалоит, убри азы иаҳцәыӡуа хымш ракәхоит. Жьҭаара 6 рзы ашкол аусура хацнаркуеит", - лҳәеит Ҭаркьылԥҳа.
Уи аԥхьа Аҟәа асанитартә ҳақьым хада Алла Белиаева илҳәахьан аҭагылазаашьа иаҿырԥшны хаз иго аклассқәа, ашколқәа, ахәыҷбаҳчақәа аркхар шалшо.