АҞӘА, жьҭаара 25 - Sputnik. Аԥснытәи ашколхәыҷқәа мчыбжьык ҳәа иоурышьҭит, аминистрра ҭагалантәи аԥсшьарамшқәа ирыцнамҵеит. Абри атәы радио Sputnik иазеиҭеиҳәеит Аҵареи абызшәатә политикеи рминистрра ауаажәларратә еимадара аҟәша аиҳабы Аслан Қәҭелиа.
"Иахьа инаркны ашколхәыҷқәа мчыбжьык ҳәа иоушьҭуп. Ҳәарада, ари акоронавирустә инфекциа аламырҵәара иацхраауеит. Ҩымзтәи аҵараҵара ашьҭахь ашколқәа рырзҩыдара мҩаԥгатәуп. Уи адагьы арҵаҩцәеи аҵаҩцәеи рыԥсы ршьоит", - азгәеиҭеит Қәҭелиа.
Уаанӡа Аԥсны ауааԥсыра акоронавирустә инфекциа рацәыхьчара иазку Акоординациатә штаб аилатәараҿы, Аҵареи абызшәатә политикеи рминистр Инал Габлиа аҳәамҭа ҟаиҵахьан, аԥсшьарамшқәа аҽа мчыбжьык рыцҵахар ҟалоит ҳәа.
"Ахәыҷқәа мчыбжьык иоуҳашьҭит. Аминистрра аҭагылазаашьа хылаԥшра анаҭоит. Ес-хәаша ашколқәа рҟынтәи аҭагылазаашьаз адырра аиуеит. Аҟазауаа игәарҭоит асанитартә ԥҟарақәа ишрықәныҟәо. Ашколқәа рҿы ҭахрақәак ыҟазар иҳалшо ала ҳрыцхраауеит", - иҳәеит иара.
Зынӡа Аԥсны 4000-ҩык арҵаҩцәа ыҟоуп. Урҭ рҟынтәи шәҩык акоронавирус рыдбалоуп, 30 000-ҩык ашколхәыҷқәа рҟынтәи COVID-19 рзышьақәырӷәӷәоуп- 147-ҩык.