АҞӘА, жьҭаара 28 - Sputnik. Аԥсны аԥыза-министр Александр Анқәаби ареспубликатә санитартә ҳақьым хада Лиудмила Скорики алацәажәеит аԥкрақәа рырӷәӷәара азҵаара. Абри атәы аанацҳауеит Аминистрцәа реилазаара асаит.
Скорик атәылаҿ иҟоу аепидемиологиатә ҭагылазаашьазы аҳасабырба ҟалҵеит, уи аиӷьтәразы ажәалагалақәа ҟалҵеит.
Асанитар ҳақьым хада илымоу адыррақәа рыла, жьҭаарамзазы акоронавирус аҽышьҭыхра ашьҭахь маҷк илаҟәит. Скорик лгәаанагарала, уи иаанагом аҭагылазаашьа аиӷьхарахь ахы археит ҳәа. Аԥсны атәылауаа уаанӡеиԥш аԥкрақәа ирықәныҟәом.
Аԥсны агәабзиарахьчара аминистрра цәыббрамзатәи аныҳәамшқәа раан ачымазара аҽышьҭнахит ҳәа иаԥхьаӡоит. Убри азы Скорик ашколтә ԥсшьарамшқәа рыцҵара хра рылам, усгьы ауаа рацәа аԥсшьарҭа ҭыԥқәа рахь инеилоит ҳәа иазылыԥхьаӡоит.
Зыхә дуу ахәшәқәа рыҟамзаара, ковид-хәшәтәырҭақәа рыҭәра, алаҵаҟаҵара иԥсыҽны иахьымҩаԥысуа, ауааԥсыра ҭакԥхықәрада рхымҩаԥгара акыр ишәарҭоуп ҳәа ахылҳәааит Скорик.
COVID-19 аҟынтә аԥкрақәа рырӷәӷәара азҵаара иахәаԥшраны иҟоуп ауааԥсыра акоронавирус рацәыхьчаразы Акоординациатә штаб аилатәараҿы.