АҞӘА, абҵара 25 - Sputnik. Аԥыза-министр Александр Анқәаб Атуризм аминистр Ҭеимураз Хышба инапы ианиҵеит 2021 шықәсазтәи асезон азы аҳасабырба ҟаиҵарц, апроблематә аспектқәа азгәаҭаны ҳәа аанацҳауеит Аминистрцәа реилазаара асаит.
Атуризм аминистр Ҭеимураз Хышба аԥыза-министр изеиҭеиҳәеит Москва усурала иҟазаара аихшьаалақәа ртәы.
Москва нап аҵаҩын Аԥсны атуризм аминистрреи Урыстәыла афедералтә маҵзуреи рыбжьара аилибакааразы Амеморандум. Анқәаб иажәақәа рыла, ари ҩ-ганктәи аусеицуразы, атуристтә маршрутқәа рырҭбааразы акыр хра аланы иҟоуп.
Аиҳабыра рхада иазгәеиҭеит аусбарҭа атәылахь иаауа аԥсшьаҩцәа ршәарҭадара ахылаԥшра, атәыла асасцәа рзы иманшәалоу аҭагылазаашьақәа раԥҵара гәцаранакларц.
"Ари, раԥхьа иргыланы, аԥснытәи акурортқәа ринтерес дырҿыхоит, ауаа аднаԥхьалоит", - ҳәа иҳәеит Александр Анқәаб.
Ҭеимураз Хышба иара убасгьы иҳәеит Москва ишалацәажәаз амшынтә круизтә маршрут Аҟәа-Шәача-Геленџьык-Ҟрым аиҭахацыркра азҵаара.