АҞӘА, ажьырныҳәа 28- Sputnik. Аҟәа иааныркылеит анаркотикқәа аҭыԥ ҷыдақәа рҿы ихәыҵаҵаны изҵәахуаз хҩык ауаа. Абри атәы аанацҳауеит Аԥсны ААР апресс-маҵзура.
Аԥхьа аоперативникцәа дааныркылеит 22-шықәса зхыҵуа Азербаиџьан атәылауаҩ Џьавид Мамедов. Уи идбалан зыкапан ф-граммк иҟоу аметадон аилаҳәарақәа.
Мамедов иҳәеит анаркотик иидыруаз Серафима Багданова Москва ишлымихәҳааз Аԥсны аиҭаҭиразы.
Иара анаркотик ахьышьҭеиҵоз аҭыԥқәа рфото ҭыхны аахәаҩцәа ирзиҭиуан.
Аамҭақәак рнаҩс, Аҟәа иаанкылан аамҭала ауада иҩназ Серафима Богданови лашьа Евгени Масальскии.
Масальски идбалан аметодон згәылаҳәаз аилаҳәарақәа ԥшьба, зыкапан 4 граммк инаӡоз.
Анаркотикқәа хәыҵаҵан ирҵәахуан Аҟәатәи амҩақәа: Воронова, Аидгылара, Басариа, Гәлиа, Сахарова, Арӡынба, Ҷоҷуа рҟни Ахьӡ-аԥша апарк аҿи.
Зынӡа иаарԥшын 45 ҵәахы, 60,2 грамм.
Мамедов, Богданова, Масальски рганахь ала ашьаус хацыркуп. Хараны ирыдырҵоит закәаншьаҭада анаркотик маҭәашьарқәа раахәара, рымазаара, аҭиразы рымҩаԥгара.
15 шықәса инаркны ԥсраҽнынӡа ахақәиҭра алхәыдатәра рықәҵахар алшоит рмазара рымхны.