АҞӘА, жәабран 20 - Sputnik. 33,8 нызқьҩык ауааԥсыра Лугансктәи жәлар рреспубликаҟынтәи ихҵәаны Урыстәыҟа ицеит иҳаҩсыз ҩаха-ҩымш рыла, абри атәы аанацҳауеит РИА Новости, ЛЖәР атәылахьчара аштаб ажәақәа шьаҭас иганы.
"Жәабран 18 асааҭ 19:00 инаркны жәабран 20 асааҭ 18:00 рҟныӡа ЛЖәР-и Урыстәылеи рҳәаа иахысит 33 815 ауааԥсыра", - ҳәа аанацҳауеит ЛЖәР атәылахьчара аштаб ажурналистцәа ирынаҭаз адырраҭара.
Уаанӡа адырра ҟалахьан Украина еибашьрала ирықәлоит ҳәа иҟоу ашәарҭара иахҟьаны ЛЖәР-и ДЖәР-и аҳәсеи, ахәыҷқәеи, абыргцәеи Ростовтәи аобласт ахь ртәыла ишалырго. ДЖәР ахада Денис Пушилин аҳәамҭа ҟаиҵеит хара имгакәа Украина ахада Владимир Зеленски Донбасс бџьаршьҭыхла дақәлоит ҳәа. Асабша ашьыжь ЛЖәР-и ДЖәР-и рхадацәа аҳәамҭа ҟарҵеит абџьар зкыр зылшо зегьы рҽеизыргарц азы.
Аҵыхәтәантәи амшқәа рзы Донбасс аҭагылазаашьа шәарҭахеит — Киев уаанӡа изеицықәшаҳаҭхахьаз зегьы мап рыцәкуа, ДЖәР-и ЛЖәР-и иареи рҳәааҿы архәҭақәа жәпакы аргылеит, убри ахыԥхьаӡараҿы иҟоуп зхархәара ҟамло атехникагьы.