АҞӘА, хәажәкыра 10 - Sputnik. Амҩа-транспорттә хҭысқәа зыхҟьо амашьына аԥсҟы арыжәтә чьбара ыжәны аныҟәцара, амашьына арццакра, амҩатә ԥҟарақәа реилагара ҳәа иҳәеит аколлегиа аилатәараҿы апрокурор хада ихаҭыԥуаҩ Дамир Кәыҵниа. Абри атәы аанацҳауеит "Аԥсныпресс" амаҵзура.
"Амҩатә машәырқәа еиҳарак изыхҟьо атранспорттә хархәагақәа арыжәтә џьбара ыжәны рныҟәцара, амашьына арццакра, амҩатә ԥҟарақәа реилагара ауп", - ҳәа Кәыҵниа иажәақәа аанагоит "Аԥсныпресс".
Иара иажәақәа рыла, 2021 шықәсазы Аԥсны 182 амҩа-транспорттә машәыр ҟалеит, иҭахеит 42-а. 2021 шықәсазы 65 хҭыс рганахьала ашьаусқәа хацыркуп.
2020 шықәсазы 198 мҩатә машәыр ҟалеит, иҭахеит 57-ҩык. Абас ала, амҩатә машәырқәа 16 рыла еиҵахеит 2021 шықәсазы, иҭахазгьы 15-ҩык рыла еиҵан.
Амҩатә машәырқәеи урҭ раан иҭахази рхыԥхьаӡара шеиҵахазгьы, аҭагылазаашьа уадаҩуп.
Апрокурор хада ихаҭыԥуаҩ иазгәеиҭеит амашьына арныҟәцаҩцәа рҟазара шышьҭыхлатәу, атранспорттә хархәагақәа ртехникатә ҭагылазаашьа иахылаԥшлатәуп, амҩақәа ирхылаԥшлатәуп.