АҞӘА, хәажәкыра 21 – Sputnik. Аԥсны Жәлар Реизара адепутатцәа аҭыԥантәи ахаланапхгараҭара аусхк аҟны азакәанԥҵаратә актқәак рахь аԥсахрақәа аларгалеит.
Аҳәынҭқарра-зинтә политиказ аилак ахантәаҩы Валери Агрба иажәақәа рыла, "Аҭыԥантәи ахаланапхгараҭара аусхк аҟны Аԥсны Аҳәынҭқарра азакәанԥҵаратә актқәак рахь аԥсахрақәа раларгаларазы" азакәан апроект азырхоуп ари асистемаҿ амаҵзуратә хаҿқәа раҭареи уи азы аиқәшаҳаҭреи рпроцедура аиӷьтәра.
Аԥсахрақәа ирыҵаркуеит ачынуаа ақалақь, араион рнапхгаҩы инапынҵақәа назыгӡо истатус ала рыҿҳәара аԥсахра. Анормақәа инарықәыршәаны, уи хымз еиҳамзароуп.
Аҭыԥантәи ахаланапхгараҭара аусбарҭақәа реинырра аизырҳареи анапхгаҩцәа рҭакԥхықәра аизырҳареи ахықәказы азакәан аҳәаақәа ирҭагӡаны ақалақь, араион рхадарақәа рыҟәшақәа рнапхгаҩцәа ркандидатурақәагьы еиқәшаҳаҭрала ишьақәырӷәӷәалатәуп.
Азакәан апроект иалхын апункт аҭыԥантәи ахаланапхгараҭара аусбарҭақәа ррезервтә фонд аԥҵаразы. Уи азырхан атәылауаа русура аиҿкааразы аматериалтә ҵәахрақәа, ауааԥсыра рхарџьқәа рхарҭәаара, хаҭала абзазаратә зҵаарақәа рыӡбара.
"Аҭыԥантәи ахаланапхгараҭара аусхк аҟны Аԥсны Аҳәынҭқарра закәанԥҵаратә актқәак рахь аԥсахрақәа раларгаларазы" азакәан ахԥатәи аҵыхәтәантәи аԥхьарала ирыдкылоуп.