АҞӘА, хәажәкыра 29 – Sputnik. Аԥхынтәи атурқәа авалиута аиҭакра иахҟьаны 20-30% аизҳара аганахьала рҽырыԥсахуеит ҳәа аанацҳауеит РИА Новости, Аԥсны атуризм аминистр Ҭеимураз Хышба иажәақәа шьаҭас иҟаҵаны.
"Ҵыԥх ахәқәа шьҭымхкәа раанкылара ҳалшазар, уажәы аҭагылазаашьа ҽакала иҟоуп. Афатә аалыҵ ахәԥса аизҳара адоллар акурс иадҳәалоуп. Бжьаратәла 20-30% ирыцлар ҟалоит. Ҵыԥх хынтәтәи акрыфара ахәԥса 600 мааҭ артәозар, сынтәа 800 мааҭ еиҵахом", – иҳәеит Хышба.
Аминистр иҳәеит Аԥсны урыстәылатәи атуристцәа рыбжьара еиҳа иалырхуа аҭыԥқәа рҿы аԥыжәара аиур ҟалоит ҳәа.
"Сгәы иаанагоит иааиуа асезон 2021 шықәсатәи асезон иеицәахарым ҳәа", – иҳәеит Хышба.
Аотель "Велнес Парк Отель Гагра" ахатәтәҩы Игор Жигун игәаанагарала, атуристцәа рырацәара авиабилеҭқәа рыхәԥсақәа ахьынӡамариоу иадҳәалахоит, иара убасгьы альтернативатә хырхарҭақәа: Ҭырқәтәылеи Египети рҭагылазаашьа. Анырра ҟанаҵоит урыстәылаа рекономикатә маншәаларагьы.
Жигун иҳәеит абзазаратә химиа, афатә аалыҵ, аба, абылтәы рыхәқәа 20% еиҳамхар, ахәқәагьы рацәак ишьҭыҵуам ҳәа.
Атуроператорцәа иазԥхьагәарҭоит аԥарахсаалага "Мир" Аԥсны иахьаднакыло азы аԥсшьараз ирҭаху ахырхарҭақәа иреиуахоит ҳәа.