АҞӘА, мшаԥы 6- Sputnik. Аԥсны Алхратә комиссиа хада 8-тәи алхырҭа ҭыԥ хада аҟны аиҭалхрақәа рымҩаԥгаразы рымзартә уснагӡа шьақәнаргылеит ҳәа аанацҳауеит "Аԥсныпресс".
Ауснагӡа инақәыршәаны аполитикатә партиақәеи аԥшьгаратә гәыԥқәеи рҭаҩра мҩаԥгахоит мшаԥы 8 инаркны мшаԥы 28 асааҭ 18:00 аҟынӡа.
Адепутатрахь акандидатцәа ҭарыҩуеит - мшаԥы 8 инаркны мшаԥы 28 асааҭ 18:00 аҟынӡа.
Адепутатрахь акандидатцәа ҭарыҩуеит мшаԥы 28 лаҵара 18 рзы.
Акандидатцәа шҭарҩыз азы адырра кьыԥхьхоит аҭаҩра ашьҭахь аԥшьбатәи амш иахымгакәа.
Абжьыҭара ахьымҩаԥгахьоуи ианымҩаԥгахои рзы алхыҩцәа адырра рыҭахоит лаҵара 18 иахымгакәа, иара убри аан азеиԥшдырразы ицәыргахоит алхыҩцәа рсиақәа.
Алхратә биуллитенқәа рыла акомиссиақәа еиқәдыршәоит алхрақәа 1-2 мшы шагу.
Абжьыҭара ахаҭа мҩаԥгахоит лаҵара 28 азы асааҭ 08:00 - 20:00 рзы.
Лаҵара 28-29 рзы алхырҭатә ҭыԥқәа ркомиссиақәа абжьыҭара алҵшәақәа рзы аԥкаанҵақәа нарышьҭуеит алхырҭатә ҭыԥ хадақәа ркомиссиақәа рахь, алхрақәа рышьҭахь ҩымш ирхымгакәа.
Заанаҵтәи адыррақәа ҟаҵахоит лаҵара 29 азы. Иалху акандидат ашәҟәы дҭаргалоит алхра ашьҭахь бжьымш ирхымгакәа.
Аԥсны Жәлар Реизарахь алхрақәа мҩаԥысит хәажәкыра 12 рзы, усҟан иалхын 17-ҩык адепутатцәа, 17 алхырҭатә ҭыԥ рҿы алхрақәа аҩбатәи ртур мҩаԥган хәажәкыра 26 рзы.
Алхрақәа рылҵшәақәа рыла, абжьыҭара шьақәгылеит алхратә ҭыԥқәа 16 рҟны, Алашарбагатәи аабатәи алхратә ҭыԥ хадаҿы аиҭалхрақәа мҩаԥгахоит иқәгылаз акандидатцәа алхрақәа аҩбатәи ртур аҟны абжьқәа еиҟараны иахьроуз иахҟьаны.