АҞӘА, мшаԥы 12- Sputnik. Асмаҭ Ҵәыџьԥҳа. Аԥсны Жәлар Реизара абыжьбатәи ааԥхьара раԥхьатәи реилатәараҿ ахантәаҩы ихаҭыԥуаа алхуп: Ашоҭ Миносиан (21-ы рыбжьы ирҭеит), Асҭамыр Аршба (33-ҩык рыбжьы ирҭеит), Фазлыбеи Аҩӡба (33-ҩык рыбжьы ирҭеит).
Апарламент ахада ихаҭыԥуаас ркандидатурақәа ықәгылан Ашоҭ Миносиан, Асҭамыр Аршба, Фазлыбеи Аҩӡба, Галуст Трапизониан.
Аԥсны Жәлар Реизара абыжьбатәи ааԥхьара ахантәаҩыс еицҿакрыла далхуп Лаша Ашәба.
Ҿыц иалху адепутатцәа раԥхьатәи реилатәара иалахәын Аԥсны ахада Аслан Бжьаниа, аԥыза-министр Александр Анқәаб, ахада ихаҭыԥуаҩ Бадра Гәынба, атәыла анапхгара, Аминистрцәа реилазаара рхаҭарнакцәа. Уахь инаԥхьан Аԥсны апрокурор хада, аӡбаҩцәа, араионқәеи ақалақьқәеи рхадацәа, Аԥсны абыргцәа рхеилак алахәылацәа, иара убас ааԥхьара змаз Аҳәынҭдума адепутат Константин Затулин.
Аилатәара аартын аҳәынҭқарратә гимн арҳәарала, уи ашьҭахь ажәа иҭан Аслан Бжьаниа.
Жәлар Реизара абыжьбатәи ааԥхьарахь иалху адепутатцәа рхыԥхьаӡараҿы иҟоуп уаанӡатәи ааԥхьараҿы депутатцәас иҟаз быжьҩык - Лаша Ашәба, Ҭемыр Беииа, Асҭамыр Аршба, Алхас Ҳагба, Левон Галустиан, Ашот Миносиан, Венори Бебиа.
Жәлар Реизара абыжьбатәи ааԥхьара раԥхьатәи реилатәара иалахәын 33-ҩык адепутатцәа. Алхырҭатә ҭыԥқәа ҩба - №8 (Алашарбагатәи) №18 (Гәдоуҭатәи) рҟны аиҭалхрақәа мҩаԥгахоит.