АҞӘА, мшаԥы 19- Sputnik. Аԥсны ахада Аслан Бжьаниа арра анаԥхьара иазԥҵәоу аамҭа аҽҭагӡареи иахәҭоу ҩаӡара ҳракыла ауснагӡатәқәа рымҩаԥгареи шхымԥадатәиу азгәеиҭеит. Абри атәы аанацҳауеит Атәыла ахада ипресс-маҵзура.
Бжьаниа атәыла аԥыза-министр, Аԥсны аиҳабыра, ахада Иусбарҭа анапхгаҩы, Ашәарҭадаратә хеилак амаӡаныҟәгаҩ, Атәылахьчара аминистр, араионқәеи ақалақәеи рхадацәа алархәны аизара мҩаԥигеит.
Иазгәаҭоуп, аилацәажәара алахәылацәа атәыла ашәарҭадара азҵаара ишазааҭгылаз.
Аԥсны атәылахьчара архәҭақәа рахь аррамаҵзура ахысразы инарыԥхьоит 18-27 шықәса зхыҵуа, аррамаҵзурахьы анаԥхьара зыхәҭоу Аԥсны атәылауаа.
Ахада Иусԥҟа инақәыршәаны, аррахь рнаԥхьаратә уснагӡатә мҩаԥысуеит мшаԥы 1 инаркны рашәара 30 рҟынӡа.