АҞӘА, лаҵара 8 - Sputnik. Аԥсны аԥыза-министр Александр Анқәаб Урыстәыла Аиҳабыра рхада Михаил Мишустин идиныҳәалеит Аџьынџьтәылатә еибашьра Ду аҟны игоу Аиааира 77 шықәса ахыҵра. Абри атәы аанацҳауеит Аԥсны Аминистрцәа реилазаара асаит.
Анқәаб иазгәеиҭеит милаҭ рацәала еилаԥсаз Асовет Еидгыла Аиааира ишазықәԥоз, зегьы рыжәҩахыр еибыҭаны ԥсра зқәым афырхаҵара аадырԥшит Ҳаԥсадгьыл ду аиқәырхаразы.
Иара инаҵшьны иҳәеит Аԥсны ҳаҭыр ду шақәырҵо, ишазгәыдуу Аиааира аветеранцәа ргәымшәара, иҭахази иахьанӡа изымааизи ргәалашәара шкадмыршәуа.
"Ажәашықәсақәа рышьҭахь, ари аныҳәа ԥшьа ҩаԥхьа ҳаԥыло, ҳара еилаҳкаауеит анацизм ашәарҭара ду шаҵоу, уи аидеиақәа иахьагьы рыԥсы ҭазаап. Ҳара ҳҩызаратә ҳәынҭқарра, ҳастратегиатә партниор - Урыстәылатәи Афедерациа - иахьатәи аамҭазы уи иаҿагыланы Украина ақәԥара иақәшәеит", - иҳәеит аԥыза-министр.
Аԥсны Аиҳабыра рхада агәрагара ааирԥәит Урыстәыла Украина имҩаԥнаго арратә операциа ҷыда иаарласны қәҿиарала ихыркәшахап ҳәа.
Иара даҽазныкгьы игәалаиршәеит Аԥсны Урыстәыла ари азҵаараҿы ишадгылоу, ҷыдала иуҳәозар, Аԥснынтәи хатәгәаԥхарала арратә операциа иалахәхарц аибашьцәа шцаз.