АҞӘА, лаҵара 21 - Sputnik, Бадраҟ Аҩӡба. Акультуратә хәышҭаара "Гәыма" аҿы иаадыртит аԥсуа сахьаҭыхыҩ, аскульптор, Асахьаҭыхыҩцәа реидгыла алахәыла, Аҟәатәи асахьаҭыхратә ҵараиурҭа аиҳабы Амиран Адлеиба иусумҭақәа рцәыргақәҵа.
Ацәыргақәҵа азкуп Кавказтәи аибашьра иалаӡыз ргәалашәара амш. Уа иқәыргылоуп 15 усумҭа, урҭ амҳаџьырра иазкуп.
Аҟәа даҽа цәыргақәҵакгьы аус ауеит Аԥсуа драматә театр аҿаԥхьа. Уа иқәыргылоуп зҭоурыхтә ԥсадгьыл ахь ихынҳәыз ҳџьынџьуаа русумҭақәа.
Кавказтәи аибашьра иалаӡызи амҳаџьырра иагаз ашьхарыуа жәларқәа рхаҭарнакцәеи Аԥсны есышықәса иргәаладыршәоит лаҵара 21 рзы.
Аҟәа амш иалагӡаны еиуеиԥшым аусмҩаԥгатәқәа еиҿкаауп - имҩаԥысхьеит "Нарҭаа дуқәа реиԥхныҩлара" захьӡу атлетика лас азы аицлабра, амца ду аиқәҵара, амзақәа реиҭаҳара, ашәҭқәа рышьҭаҵара.
Кавказтәи аибашьра иалаӡыз ргәалашәара амш азгәарҭеит Гәдоуҭагьы. Агәалашәаратә церемониа иалахәын араион анапхгареи ауаажәларреи.