АҞӘА, рашәара 8 - Sputnik. Аԥсны ахәшәтәырҭақәа аԥхынтәи аԥсшьараамҭа иазыхиоуп ҳәа аҳәамҭа ҟаиҵеит агәабзиарахьчара аминистр Едуард Быҭәба.
Иазгәеиҭеит, ахәшәтәырҭақәа амедицинатә цхыраара аҟаҵаразы ишазыхиоу, ааигәа иаахәан ацхыраара лас амашьынақәа быжьба, амедусҳәарҭақәа иахәҭоу ахәшәқәеи амаругақәеи рыла еиқәыршәоуп.
Аминистр иажәақәа рыла, есышықәса атәыла ахәшәтәырҭақәа ирыдҵаалоит 8000-ҩык атуристцәа.
Ачымазцәа рхыԥхьаӡара анеизҳауа ааамҭазы, иаҭахханы иҟалар, аҳақьымцәа ргәыԥқәа дәықәҵахоит Гагреи Пицундеи рмедусҳәарҭақәа рахь иҳәеит аминистр.
Аԥсны асанитартә ҳақьым хада Лиудмила Скорик ауаажәларратә крыфарҭақәеи атуристтә аобиектқәеи реиҳабацәа рахь аҳәара ҟалҵеит, афатәи абактериақәеи ирыхҟьаны ԥырхага ҟамларцазы асанитар-епидемиологиатә ԥҟарақәа ирықәныҟәаларц.