АҞӘА, рашәара 16 – Sputnik. Жәабран 24 рнаҩс Херсонтәи аобласт аҟны ииз ахәыҷқәеи, ииаҭыму ахәыҷқәеи Урыстәыла атәылауаҩра роулоит, абри атәы РИА Новости иазеиҭеиҳәеит арегион арра-тәылауаҩратә напхгара аиҳабы ихаҭыԥуаҩ Кирилл Стремоусов.
"Жәабран 24 рнаҩс Херсонтәи аобласт аҵакыраҟны ииз ахәыҷқәа иаразнак Урыстәыла атәылауаҩра роулоит. Иара убас Урыстәыла иатәылауаҩуп ҳәа ашәҟәы иҭаргалоит ииаҭыму ахәыҷқәа", - иҳәеит иара.
Урыстәыла Украина арратә аоперациа ҷыда иалагеит жәабран 24 рзы.
Херсонтәии Запорожиетәии аобластқәа урыстәылатәи аоперациа ҷыда Украина амҩаԥгараан Урыстәыла Арбџьармчқәа рнапаҵаҟахь ииаган. Арегион аҟны ус руеит урыстәылатәи ателеканалқәа, арадио, Ҟрыми аобласти рыбжьара ахәҳаахәҭратә еимадарақәа реиҭашьақәыргылара иаҿуп. Арегионқәа рыҩбагьы Урыстәыла алалара шырҭаху азы аҳәамҭа ҟарҵеит.